Nacha

Nayacha macho ya wachwa, pale zama yachunzapo
Nayacha kucha na kuchwa, yachecheapo nilipo
Nayo yakijua yachwa, ndo uchunzi uzidipo
Nacha sitachapo kucha, yachwayo nami nayacha

Nazingwa

Nazingwa ni ndugu zangu, wasonijua nilipo
Waumia kwa uchungu, kila wanikumbukapo
Waniombea kwa Mungu, mafanikio na pepo
Numonumo ndilo langu, tenda, tarudia kuko.

Hunifai

Wanitaka niwe wako, ati wa ubani
Niwe wako mali yako, niwewo mwandani
Siliwezi penzi lako, sebu abadani
Bora kaa peke yako, uwe mbali nami

Ni Lipi Kosa Langu?

Karima ni Mola wangu, uwezo kunijalia
Huu si uwezo wangu, kipaji kutunikiwa
Kutupa kalamu yangu, hekima kuwapatia
Ni lipi kosa langu, dharau kutunikiwa?

Hamkani

Dhoruba hii hakika, huchukua na kuzoa
Kwa wenye kubahatika, na kwa kipaji Jalia
Seuze wa tikatika, na wale mazoa zoa
Nani atabakia?

Salata

Uliniahidi, kwamba wenipenda ‘tanitumikia
Ukaitakidi, kuwa ‘tanilinda na kunitetea
Iwapi ahadi, mbona kushapinda wanigeukia?

Kata’ani

Haiwi!
Na wala haitokuwa
Kata’ani nakataa

Kuonewa!
Kubugudhiwa!
Kusulubiwa!
Kamwe haitokuwa

Na Ndio Maisha

Raha ya maisha ni kutaka jambo katu ‘silipate
Ukalitafuta kwa vyote vsihindo usilifumbate
Hila zikakwisha ‘kabaki uvundo na misurumbwete
Na ndio maisha

Maisha rahaye n lyako kupata ukapigwa pute
Asiye mwenyewe akaja kupoka akamba n lyake
Mijitu ja mwewe ishalyaanika kwa laana zote
Na ndio maisha